तुम्ही तुमच्या जोडीदाराची निवड काळजीपूर्वक कराल. अशा वेळी चूक केली तर त्याचे परिणाम काय होतील ते तुम्हाला चांगलेच माहित असल्यामुळे तुम्ही काळजी घ्याल. यामुळे तुमचे लग्न काहीसे उशीरा होईल. पण एकदा तुमचा निर्णय झाला की, तुम्ही एक उत्तम जोडीदार असाल.

आरोग्याचा विचार करता तुम्ही सुदैवी आहात. तुमची प्रकृती उत्तम आहे. पण जर कोणता अवयव इतर अवयवांच्या मानाने नाजूक असेल तो म्हणजे हृदय, आणि हृदयाशी जोडलेले अवयव. त्यामुळे चाळीशीनंतर हृदयाकडे नीट लक्ष द्या आणि त्यावर फार ताण येऊ देऊ नका. तुमच्या डोळ्यांचीही काळजी घ्या. पण ही काळजी उतारवयात घ्यायची नसून तरूणपणीच घ्यायची आहे. तुम्ही तारुण्य पार केले असेल आणि तुमची नजर उत्तम असेल तर समजा की, तुम्ही ते धोकादायक वळण पार केले आहे. उत्तेजक पदार्थांचा तुमच्यावर दुष्परिणाम होऊ शकतो. यांचे सेवन टाळता आले तर तुम्ही निरोगी दीर्घायुष्य जगाल.

तुम्हाला कोणते छंद आवडतात असे स्वतःला विचारले तर शारीरिक श्रमांपेक्षा तुमच्या बुद्धीला चालना देणारे छंद तुम्हाला अधिक आवडतात. त्यात तुम्हाला चांगलेच यश मिळेल. तुम्ही चांगले बुद्धीबळपटू होऊ शकाल. तुम्हाला पत्ते आवडत असतील तर तुम्ही उत्तम ब्रिज खेळाडू व्हाल.